خلال الفترة دى كانت علاقه سميحه وولادها شبه معدومه
اتصلت سميحه بمنصور وفارس وقررت انها تقابلهم وهما طلبوا منها تقابلهم فى شقتها القديمه
استغربت سميحه لطلبهم وراحت تقابلهم
سلم عليها اولادها ببرود فاستعجبت سميحه طريقتهم معاها أول مره
ـ فى ايه حصل حاجه شكلكم مش عاحبنى
ـ بابا يا ماما بعد ما خرج من هنا يوم كتب كتابك وقع وكان هي*مـ,ـوت وأحنا لحقناه على اخر لحظه
ـ وأنا مالى
اتكلم فارس بانفعال
ـ إنتى السبب لو مكنتيش هنتيه قدامنا وعملتى اللى عملتيه مكنش حصله كده
بصت سميحه لمنصور بسخريه وسالته
ـ
وأنت يا منصور عاجبك كلام اخوك
بص منصور لفارس يهديه ورجع بصلها
ـ أهدى يا فارس عيب كده … وفعلاً يا ماما المفروض كنتى عرفتينا باللى بتعمليه لكن ليه تعملى كده وطالما رجعلك حاجتك كنتى قولتيله إنه خلاص كده اخدتى حاجتك ومش عايزة تشوفيه لكن ليه لزمتها تجبيه ويحصل اللى حصل ده انتى عاحبك منظرك
ـ عشان كده ماكنت ش بتسألوا عنى الفتره اللى فاتت ؟؟
عشان زعلانين على ابوكم
حست سميحه إن الدنيا بتلف بيها وسندت على اقرب كرسى ليها وبصتلهم بغض**ب لاول مره وبدأت تكلمهم بانفعال وانفج*ار عن مشاعر كانت كتمانا جواها
ـ زعلانين على ابوكم عشان اخدت منه حقى وشافنى وأنا بتجوز غيره
بعد ما هو اللى طلقنى ورمانى بإختياره
مازعلتوش منه ليه واخدته منه موقف زمان لما باعنى وراح اتجوز غيرى ورماكم ها ؟؟ ردوا عليه
ماكنتوش بتسألوه ليه مابتصرفش علينا يا بابا وسايب خالنا هو اللى يصرف علينا ؟؟
ماسألتهوش ليه مكنش بيفسحكم ويسفركم ويخرجكم زى ما كان بيعمل مع ولاد مشيره عشان يراضيها ؟؟
كنتوا فين وانا بسمع كلام الجيران وهما بيسألونى جوزك رماكى ليه ورمى عياله
كانوا بيقولوها كده صريحه
دول لو عياله مكنش رماهم اكيد عرف حاجه عشان كده طفش منها
عشانكم استحملت افضل على زمته كل السنين دى كان ممكن اخد حقى بدل المره عشره بس كنت بسكت وبرفض مش ضعف منى
أبدا لكن عشان خاطركم انتوا
أنا عمرى ما كنت ضعيفه لكن كنت بتغاضى عشاكم
تفتكروا خالكم مكنش قادر يخلص منه او يبعت حد يخطف*ه ويهدده ويرجع ورثنا تانى
لكن كنا بنسكت عشانكم
ابوكم دلوقتي صعبان عليكم بعد ما
رجعت حقى منه
طيب أنا ماصعبتش عليكم كل السنين اللى فاتت دى
عارفين أول مره احس انى معرفتش اربى خساره تربيتى فيكم يا خساره
سابتهم سميحه وخرجت وقف منصور وفارس بيبصوا فى اثارها بحيره
حاول منصور يخرج يلحقها لكن معرفش
وقف منصور وفارس يبصوا لبعض بقله حيله
ـ عاجبك كده فارس؟؟
ـ مش عارف يا منصور أنا كنت متضايق عشانه
ـ بس برضو مكنش ينفع نكلمها كده كانت دماغنا فين لما بنعاتبها ونسينا اللى عمله فيها زمان
ركبت سميحه العربيه اللى كان مخصصهالها عبد الظاهر
وبعدها اتصلت بعبد الظاهر وهى بتعيط رد عليها بقلق من صوتها
ـ مالك يا سميحه حاجه حصلت ولا ايه
ـ أه عايزاك تيجى دلوقتي لو ينفع
ـ إنتى فين ؟
ـ كنت مع فارس ومنصور ومروحه على البيت
ـ طيب حصل ايه عشان تبقى بالحاله دى
ـ لما تيجى هتعرف
ـ نفتكروا منصور وفارس هيسبوا باباهم بعد اللى حصل وحسين هيكون مصيره ايه ؟
وهل هياخدوا حق ابوهم من مشيره وولادها ؟؟